Psalms 68

Maaron, ye Volaaŋa ariaŋa to tamtoghon toni

Mbouŋ to David

1Maaron pale imundig ve ireu mbirisan koia.
Yes to tighur koi pani, ye pale indiir di tighau pa mata.

2Ye pale ipasob di le tisob kat, tinimale yab mbuasa to iza, ve yaghur iviviira ilale.
Ighaze ndiran samsamia tineep ila Maaron nagho, ye pale iwaghamun di ve tilaledi tinimale bagil to ineep igharau yab dige, ve yab ilavaara, ve ireer ila, le isob.

3Eemoghon ndiran deŋiadi, yes pale lolodi poia kat.
Pale tineep ila Maaron nagho, ve tinidi iza ve tilool.
4Ambou pa Maaron.
Ambou ve apait iza, ve agharaat ataam pani.
Ye Ŋgeu to ineep ila yaghur tae pogho, ve indaloova.
Ye iza Yoova.
Alup gham ila nagho, ve tinimim iza pani. ^a

5Maaron ineep ila ina patabuaŋ, ve iŋgin yes parooŋa inimale tamandi.
Ye ivolvool to yes ndinaara, ve iyondyood padi. ^b

6Yes to eŋgendi tineep, Maaron pale igham tamtoghon pida tinim nditadi, leso yesŋa tilup di ve tineep.
Ve yes to koiadi tighur di sorok tilooŋ tila ruum to yabyabuuŋ, ye ipaspas di tivot, ve imuuŋ padi, ve igheghereb di tila, leso tigham nepooŋ poia.
Tovenen tinidi iza ve timbou, ve titaghoni gha tila.
Eemoghon tamtoghon to tighamgham didiaaŋ, yes pale tineep sami ila taan to le ya maau ve imamaas kat.

7Maaron, sawa to yom umuuŋ pa tamtoghon tiom Israela, ve yamŋa alaagh izi ndug balim, yoŋgyoog itok taan, ve uman tiina itap tata ve izi.
Maaron to Israel, ndug tiom to ghamuuŋ pooz, nene lolooz Sinai. Yom upatooŋ taum uvot ughazooŋ tonowe. ^c

9Maaron, taan to ugham pa tamtoghon tiom, ighaze ndag tiina ve imamaas,
yom ughamgham uman tiina itaptap izi pa ipambees taan, leso mbeb titub muul.

10Tamtoghon tiom tigham taan tonene inim ledi ndug to nepooŋ.
Yei mbolaaŋa. Lemai mbeb eta maau. Eemoghon Maaron, yom poia pughu.
Tauto ugham taan tonene payei, leso iuul ghei.
11Ŋgeu Tiina ivotia malmal varu ighaze ye ilib pa koia wa.
Tovenen ndiliva ival tilaan tila, ve titemtem tighaze:

12“Ou alooŋ! Yes kinik toman ndaaba todi tila wa! Tisob tighau tila wa!
Tauto ndaaba toit tiyou mbeb to koiaad tinim, ve tigham di pa ndiliva to tineep izi paanu we, leso tiwarein di.

13Ndiliva tiei tipambood di pa silva ve gol, le paghunadi kat, tinimale man mbaluuz to tigharaata pa silva, ve tipaak gol milmilia ila bage.
Pughu vena to yam pida ala pa malmal maau, ve aneep sorok izi paanu toman sipsip?”

14Sawa to Maaron ariaŋa ireu mbirisan yes kinik,
ye igham ais patu patu titaptap tizi ila lolooz Zalmon. Tauto inaan di tighau tila.
15Lolooz to ndug Basan, nene tiina ve daba izala kat, ve le mbuŋa mbuŋa ve kazimuŋa katindi.
Daba izala kat, tauto ye le iza.

16Lolooz to ndug Basan, yom lem mbuŋa mbuŋa naol. Pughu vena to ughita Maaron igham lolooz Zion inim ina to nepooŋ, ve ireu lolom? Tauto lolom isami pani ne?
Onoon kat, ye pale ineep izi lolooz tonene itaghoni taghoni gha ila.
17Ŋgeu Tiina ipul lolooz Sinai, ve ilaagh toman karis toni ndiŋndiŋ ndiŋndiŋ to malmal,
le tila tivot izi ina patabuaŋ to Zion we.

18Maaron, yom ughereb koiamŋa katindi to ulib padi ne,
ve titaghon ghom, ve yamŋa azala lolooz tiom daba to sala we.
Tamtoghon tigham lem mbeb popoiadi naol.
Yes to tizorzoor aliŋam ne paam, tiput aghedi payom, ve tigham lem mbeb.
Onoon kat, Maaron toit Yoova, moghon moghon ye inepneep izi lolooz toni tonene. ^d
19Tapait Ŋgeu Tiina pa poia toni!
Ndag to naol ne, ye iuluul ghiit pa badooŋ pataŋani toit.
Maaron toit, ye Maaron to ighamgham mulin ghiit pa pataŋani toit. ^e

20Maaron toit, ye Maaron to ulaaŋ. Onoon kat, Maaron toit Yoova, ye ighamgham mulin ghiit. Tauto tamaat maau, ve taneep pooi. ^f

21Maaron pale irab balagin koia dabadi.
Tamtoghon to titaghon ataam samia, ve tighamgham sosor, ye pale irab mbirisan dabadi rubruuba, le tisob timatmaat.
22Ŋgeu Tiina isaav ighaze: “Koiagŋa irau tighau maau.
Ighaze tineep izi lolooz to ndug Basan, ma tineep sila kat izila mazovan, nene pale nagham di tisob timuul tinim.

23Siŋidi pale ireer izi, le ipot inimale karoos ila taan pogho, leso awai ila.
Ve ŋgavuun tiam pale tighuni le isooŋ di.”
24Maaron, yom kinik tiou.
Yom ulib pa koiamŋa wa.
Tauto aazne, unum toman lolom poia, ve ulooŋ ula rumai tiom patabuaŋ ila ival tiina matadi.
Yom umuuŋ, ve tamtoghon tiom titaghon ghom ve yamŋa alooŋ ala.

25Yes to mbouŋ timuuŋ,
ve ndiliva papaghu titoktok kakaap, ve titaghon di.
Ve yes to tipambar ambam, ve yes to tivivib sab ve tavuur tilaagh muri.

26Yam Israela to avot ila to Yakop, alup gham ila Maaron nagho ve apaiti pa poia toni.
Yam asob apait Yoova iza!

27Aghita. Rumai to Benyamin to ival maau ne, timuuŋ.
Ghoro yes daba to Yuda toman tamtoghon todi titaghon di.
Ve yes daba to Sebulun ve Naptali tilaagh muri.
28Maaron, yom usaav ariaŋa pataghaaŋ ughaze yei Israela pale lemai tapirimai tiina, ve niyoon ariaŋa.
Upatooŋ tapirim payei muul, inimale muuŋ upatooŋa payei.
29Yes kinik to taan pale tinim tivot Yerusalem, ve tigham lem mbeb popoia ilooŋ ila rumai tiom patabuaŋ.

30Yes Isipa tinepneep ila vivib lolo to ya Nil dige we tinimale poghai.
Ve yes kinik to ndug pida tilaghlaagh toman ndaaba todi tinimale makau ketooŋ to tiketkeet toman ndinatudi.
Uyaan koiamai tonowen, leso tiput aghedi payom, ve tighur yaam silva todi inim lem pa tipakur ghom.
Ndug ndug to lolodi pa ghamuuŋ malmal, ureu mbirisan di.

31Kinik to yes Isipa pale imbaaŋ uraata toni tinim Yerusalem, leso yeiŋa nisavsaav pa lupuuŋ tiei.
Ve tamtoghon to Etiopia paam, pale rikia tikaak nimadi iza, ve tisuŋ pa Maaron.
32Yam kinik to taan toman tamtoghon tiam, ambou pa Maaron.
Ambou pani ve apaiti.

33Ye Ŋgeu to ineep izala yaghur tae pogho, ve indaloova ila tata to ineep muuŋ kat ve inim.
Alooŋ. Ye isavsaav toman tapiri tiina.
Aliŋa tiina inimale lalaav. ^g

34Tovenen yam avotia Maaron tapiri.
Ye kinik tiina to ighamgham pooz pa iit Israela, ve ipatooŋ tapiri ivotvot ila tata.

35Maaron to iit Israela, ye inepneep ila rumai toni patabuaŋ lolo, ve ipatooŋ tapiri.
Tovenen tamtoghon tighita, ve timatughez.
Ye ireirei tapiri pa tamtoghon toni, ve ipapalot di.
Tapait Maaron pa poia toni! ^h